Act 25 | ASO | STEP | Hesito' aza ogo ngamani naba lolo' ogo gamene seto hamovo' mino Kaesalea ebe' hulo neloti' Zelusalemi ebeta dizo vine'.

Acts 25

Paulo' Aza Guvelesi Ve Naba Kaesalea Goni've Gelelive Lo Line' Gamazi

1 Hesito' aza ogo ngamani naba lolo' ogo gamene seto hamovo' mino Kaesalea ebe' hulo neloti' Zelusalemi ebeta dizo vine'. 2 Dizo hetelavo eveneto' medeli mini O'moso inite' lehizi-daa' ave nabasi ido' Zuda veti ve naba'ine lingesi ezela igi Paulo' goni've'mi monovo li-imani'. 3 Ido' gomu' lovo gizi huki akalo' gohoni ongo belelone li ngamani naba Hesito'ni ti' li golo izani': Mulude do hongu lo-ledo Paulo'ni Zelusalemi numuda imiseleline losa nolo-gimune. 4 Likevo Hesito' ti' lo lo-ngimine': Paulo' aza Kaesalea ebeta nala' numungu' nalato' neive. Neinako naza ngomo ma nomino a'mida lemelesa nouve. 5 Nemu' lengitati' evene' naba minani' nete ingine ma gi'mizavo maka' lemelone. Ido' a'mine ve nene lihime've noline' nene goni' i-dilisave.

6 Ne'mine lo Hesito' aza gamene eiti nehe teni nehe ne'mine Zelusalemi aleveti vovo'ningu' mino Kaesalea ebeta lemo vine'. Lemo vo ongo go' lavo goni' do helaa' mo'mosi'velo' dizo minoo aza Paulo'nimu' lavo ele'mizi dizani'. 7 Ele'mizi dizikevo neivo Zelusalemi numudati' limi minani' Zuda ve ingine di vodo vodo i-di inite' goloso naba ne'mine mana'mine ogave li di neu' manau' igi li-dani'. Ne'mine li li-dani'za a'mine gamazi'mi gihile've nene ngeli di soto' mili Heliki'ni elebizamani'. 8 Ne'mine ikevo Paulo' monovo've lo soto' ogo ti' lo lo-ngimine': Zuda vete li hukani' lou' gamazi ma avuto' amo ido' mono' numuno naba do gopo amo ido' Loma veti guvetesi ve naba'mi gamazi ma avuto' amuvoni' ma neive. 9 Ne'mine lavo Hesito' aza Zuda ve neze ningavo lamine' ilive lo ga'ine hizo Paulo'ni ti' lo longo' o-dine': Zelusalemi numuda gele'mizo vo a'mida gonika geleloni' nene lamine' iline' o-neihe. Nadive lo gele nane. 10 Ne'mine lo longo' o-davo Paulo' ti' lo line': Loma veti guvetesi ve naba Kaesale' goni' numu'veu' omo nouve. Loma ve nouvonako nemu' me'mingukovo' goni'ne gili-nidilizave lo gele nouve. Gaza neni' monovo'ne mo gele naine' ma neive. Naza nene Zuda ve ma do goloso o-ngedesa'muvoni' ma neive. 11 Naza lihime'ne apasi-nidi nibili hililizani' votigilelo' lihime dokuvo gaza nebele helelove lo lanidiniko naza a'mine gamazikalo' e'menga lamuvodiba ingine soza li hazamu' gonito' nele'mizi nimilanako engi' mulu'ine do lamine' o-ngedo neze nene a'ningu' milalizani' aka nomive. Loma veti guvetesi ve naba Kaesale' ei' hamo' goni'ne gele-nedelive lo nemu' eita noluve. 12 Ne'mine lo lavo Hesito' aza kanisole'vesi li volelo' melo' igi Paulo'ni ti' lo lo-imine': Guvelesi ve naba Kaesale' gamazika gelelive lo nolaine' nemu' a'mine guvelesi ve nabala viline.

Agilipaki Belenikeki Paulo' Gamazi Gililisa Lasine' Gamazi

13 Ne'mine lavo gamene ma ogo vavo nimini misubo gohilati' guvelesi ve naba ma gulive Agilipaki ido' alunolo Belenikeki ingine Hesito'ni analo' dalosive li Kaesalea ebeta limasine'. 14 Limi a'mida gamene ngomosi' ma minivi' divi' nasivo Hesito' nene Paulo' gamazi've vetete' ogo guvelesi ve nolo-emo ti' lo line': Heliki' aza nene ve ma nala' numungu' miningu' haza hulomiko vavo neivo 15 naza Zelusalemi numuda dizo nouvo eveneto' medeli mini O'moso inite' lehizi-daa' ave nabasi ido' Zuda veti mono' gizebo vesi ingine a'mine ve'mi gamazi'vemu' li-nimi mulumo gono emo lihime've apase-deline li longo' i-nidave. 16 Longo' i-nidikevo ti' lo lo-ngimuvoni': Loma ve leli' monovote ne'mino nomive. Ve ma goni've neivo ma laza goni' nii-daveti mulu'ine do lamine' o-ngedelesa a'mine ve a'ningu' haza gopo molosa'mune. Gomu' nene goni' nii-daveti ve'nido' ele'mize molokunivo goni' i-dani' initeto' do tine' molo gamazi gohi lo-ngemavo gelaa' noune. 17 Ne'mine lo lo-ngemekuvo ingine limi mela hetelikevo gamene ha'na minamo gamene hamokovo' ongokuvo go' lavo goni' do helaa' mo'mosito' dize mino a'mine vemu' lokuvo ele'mizi dizani'. 18 Ele'mizi dizikevo goni' i-dave oti gamazi lani'za naza lihime've li soto' igi goloso nitekumu' lilizahe lo uha ne'mine initekumu' lami 19 engi' mono'inemukovo' li hilive ma gulive Izesu'nimu' gamazi lani'. Paulo' aza a'mine ve hilinguti' ote neive lavo ataize li elemani'. 20 Ne'mine ikevo a'ne'mine gamazi'mi monovo nado do soto' ogo gelelove lo ga'ne muki' gelo ti' lo longo' o-duve: Gaza Zelusalemi numudo' gele'mizosa a'mido' a'mine gonika geleloni' nene lamine' ilihe. Ido' ne'mine lo longo' okuvo 21 Paulo' aza Loma veti guvetesi ve naba goni've do helelingumu' gizebo ogo minelove lavo naza nene nala' numungu' mene neivo lingine gizebo i-di nizavo Loma ebeta guvelesi ve naba Kaesale' neida imiseleloni' gamene alitavo vilive lo gizebo i-dilizani' ami aleve lo-ngimuvoni'. 22 Hesito' ti' lo lo-emavo Agilipa' aza ti' lo lo-emo line': Naza a'mine ve'mo gamazi lavo gelelesa gele nouve. Ne'mine lavo Hesito' ti' lo line': Ne'mine lo ma aize' geleline.

23 Ne'mine lavo ingi go' lavo Agilipa' ve alunolo Belenike' ve gonolise atoli'mine igi ngolize alize izi mulise mili gamazi gilaa' ani' numungu' dizikesivo amiliti guve'inesi ve inginesi ido' a'mine ebeku' dizi minasive nge'meti dizani'. Dizikevo Hesito' lavo Paulo'ni ele'mizi dizani'. 24 Ele'mizi dizikevo Hesito' ti' lo line': Guvekasi ve Agilipazo, ido' lingine maka' nounivesi mukito' ve mene ningilo. Zuda ve muki' nenita igi Zelusalemi numudasi ido' melasi me vemu' li ti' li lani': Haza velesi minalinako helelive li geke' geke' lani'. 25 Lani'za lihime've nene bele helelone' votigilelo' nehe lo lihime've vise' uha do soto' amo Loma veti guvetesi ve naba'mo goni've gelelive lingumu' ve losa imiselelove lo nolo hukuve. 26 Ne'mine lo lo hukuvoni'za me ve'mi lihime'vemu' vise' ogo guvelesi ve nabala luhuvo nite' gizelove lo giluvo geni ogave. Nemu' nene lingine a'mine ve'mi gamazi gili lihime'vemu' li-nimikevo luhuvo nite' gizelove lo lengita ele'mize molo nouve. Ido' guvekasi ve Agilipazo, gasika gele lamine' ogo lo ngolo' lo lo-nemeline lo gele amuzo molo nouve. 27 Nalato' ve guvelesi vela imiselo luhuvo nite' gizo lihime'vesi lo soto' amoloni' nene negi suno duvoni' geleleseive lo gele nouve lo lo-ngimine'.